ഡിസംബറിന്റെ ഓർമ്മകൾ

December 1



ഇന്നെൻ ദിനം പൂന്തോട്ടത്തിനായ്
കടം കൊടുത്തു;
കടമായാലും രൊക്കാമായാലും 
വേണ്ടേ വേണ്ട,
എന്നായി പുഷ്പങ്ങളെല്ലാം;
വ്യസനം ഞങ്ങള്ക്ക് ഒട്ടുമേ വേണ്ട;
ഞങ്ങൾ സാദാ പൂവുകൾ മാത്രം;
ലില്ല്യും റോസും പാരിജാതവും;
ഒന്നോടൊന്നായ് കൈ കൊടുത്തു;
കാവ്യവും വേണ്ട കാവ്യാത്മകതെയും;
പൂവും പൂമ്പാറ്റയും ആർത്തുല്ലസിച്ചു;
ഇത്തിരി നേരം മാത്രമീ ഉലകിൽ;
പരിഭവവും പരാതിയും ഞങ്ങളിലില്ല
ഞങ്ങൾ വാഴുന്നു സന്തുഷ്ടരായ്!!

dec 2

അറിയുന്തോറും അടുക്കാൻ തോന്നും;
അടുക്കുംതോറും അകലാൻ വെമ്പും;
എന്തൊരു വിരോധാഭാസം ഈ ജീവിതം,
കഥയറിയാതെ ആടുന്ന വേഷങ്ങൾ മാത്രം;
ആടി തിമിർക്കാൻ തുനിയുമ്പോഴും;
ബാലിശങ്ങൾ പലതും കാട്ടുമ്പോഴും;
തളരാതെ പതറാതെ മുന്നോട്ടു പോകാൻ;
പാതകൾ സുഗമമാക്കി മുന്നേറാൻ;
അടവുകൾ പതിനെട്ടും പുറത്തെടുക്കും,
എന്നാലും വഴുതി വീണുപോയാൽ;
അത് വിധിയെന്ന് സമാശ്വസിക്കാം;
കാലം മായ്കാത്ത മുറിവുകളില്ല;
നമുക്കും വരും നാളെ ഒരു ദിനം !!

dec  03

അന്തിച്ചോപ്പ് പ്പൂശിയ മാനവും;
അവിടവിടെ അലയും മേഘതുണ്ടുകളും;
കളകളമൊഴുകും കാട്ടരുവിയും;
മുളങ്കാടിൻ മുരളീഗാനവും;
മൂവന്തി ഉതിർക്കും സന്ധ്യാരാഗവും;
കൂടണയാൻ പറക്കും പറവകളും;
മനസ്സംഘര്‍ഷങ്ങള്‍ക്കു ഔഷധമായ് ;
ഹൃദയവികാരങ്ങൾകു സാന്ത്വനമായ്;
കിനാവിന്റെ തൂവലുകൾ പാറി പറത്തി;
ഇന്നെന്റെ ചിന്തകൾക്ക് ആക്കം കൂട്ടി!!

Dec o4

തിരയെത്ര വന്നു പോയെങ്കിലും;
തീരം തൊടാതെ ആഞ്ഞടിച്ചു;
ഓർമ്മകൾ ഓളങ്ങളായ് അലയടിച്ച്‌,
ഓടിയൊളിക്കുവാൻ മാളങ്ങൾ തേടി; 
ധാരധാരയായ് മിഴിനീർ ഒഴുകുമ്പോൾ,
കാണാത്ത ഭാവത്തിൽ കണ്ണ് വലിച്ചു;
കാലത്തിൻ കണ്ണിൽ തിമിരം പിടിച്ചിട്ടും;
സ്നേഹത്തിൻ തീഷ്ണത നിറഞ്ഞു നിന്നു;
ആശകളും ആഗ്രഹങ്ങളും അടിയറ വെച്ചു;
വീണ്ടു കിട്ടില്ലെന്ന് അറിയാമെങ്കിലും;
അറിയാവുന്ന ദൈവങ്ങളെ ഒക്കെ വിളിച്ചു;
ഒരു തുണ്ട് വെട്ടം കടന്നു വരുവാൻ;
അതിയായ് മോഹിച്ചു പ്രാര്‍ത്ഥഥിച്ചു!!

Dec05

അസ്തമിക്കും സൂര്യനെ,
തടുക്കാനാകുമോ;
മോഹത്തിൻ ആഴങ്ങൾ,
കാണുവാനാകുമോ;
സ്നേഹത്തിൻ പരിധി, 
നിർണയിക്കാൻ കഴിയുമോ; 
ആശകൾ കടിഞ്ഞാണിടാൻ, 
മനസ്സിന് ആകുമോ;
ഹൃദയത്തിൻ വ്യാകുലതകൾ,
ജ്വാലയായ് മാറുമോ;
കനലുകൾ എരിയും നെരിപോടിൻ,
വേദന അറിയാനാകുമോ;
ക്രൂരമാം വിധിയെ,
തഴയാനാകുമോ ?

dec06

കണിയായി കാണാൻ കൊതിച്ച,
വർണ്ണ വിസ്മയങ്ങൾ തേടി,
എൻ കണ്ണുകൾ ഉഴലവേ;
കണ്ടു ഞാനൊരു സുന്ദര ദ്രിശ്യം;
ഈ മധുര നിമിഷമല്ലേ ജീവിതം,
എന്ന് തോന്നിക്കുമാറ് അതാ മുന്നില്..
ഹൃദയത്തിൽ നിന്നുതിർന്ന, 
പുതു പുഷ്പം പോലെ;
ആരും രചിക്കാത്ത കവിത പോലെ;
ആരും മൂളാത്ത രാഗം പോലെ;
സ്വർഗാനുഭൂതി പകരുന്ന പോലെ;
മധുര കനിയായ് മനസ്സിൽ നിറയാൻ;
മായാതെ മറയാതെ ഉളളിൽ പതിയാൻ;
ആവോളം കിണഞ്ഞു പരിശ്രമിച്ചു;
ഹാ കഷ്ടം എന്നല്ലേ പറയേണ്ടൂ;
അറിയാതെൻ കണ്ണുകൾ തുറന്നു പോയ്;
സ്വപ്നം പോലും മിന്നായം പോലെ;
ഓർത്തെടുക്കാൻ ഇട നല്കാതെ,
ദൂരെ ദൂരെ ഓടി മറഞ്ഞു !!

Dec 08

വർഷങ്ങൾ പോയതറിയാതെ,
കൌമാരം ആണെന്ന ഭാവേന;
തുള്ളി ചാടി കുതിച്ച്
കാടും മേടും താണ്ടി,
പാടവും പറമ്പും നിരങ്ങി;
കൂത്താടി നടക്കാൻ മോഹമായി, 
കല്ലെടുക്കും തുമ്പിയെ
പിടിക്കാനായി കൂടണം;
അപ്പൂപൻ താടി പോൽ പറന്നിടേണം;
മഞ്ചാടി മണികളും, കുന്നികുരുവും
ഓടി നടന്നു പെറുക്കി എടുക്കണം ;
എന്തെന്തു മോഹങ്ങൾ ഇനിയും ബാക്കി
യൌവനവും വാർദ്ധക്യവും
കടന്നു വരാത്ത ലോകം ;
നിഷ്കളങ്ക മായൊരു ലോകം;
എന്നും ബാല്യം എന്ന സ്വപ്നം;
തീരാ മോഹമായി ഉള്ളിലൊതുക്കി!!

dec09

വാക്കുകൾ കൊണ്ടൊരു;
ഭൂലോകം സൃഷ്ടിക്കാം.
മുത്തായും, മുള്ളായും; 
വന്നു തറക്കാം;
കോൾമയിർ കൊള്ളിക്കാം;
ചുട്ടു പൊള്ളിക്കാം; 
വാക്കിന്‍റെ മൂര്‍ച്ചയില്
പിളരുന്നു ബന്ധങ്ങൾ;
തളരുന്നു ഹൃദയങ്ങൾ;
തകരുന്നു പ്രാണനും ;
തേൻ മൊഴിയാലൊരു
സ്വർഗം പണിയിക്കാം;
ഓർമകളിൽ എന്നും
താലോലിക്കാം;
അറിയാതെ ഉരുവിടും
ഓരോ വാക്കും;
സ്നേഹ മന്ത്രം ആകാൻ,
ആവോളം കൊതിക്കാം!!

Dec 10

കൊഴിഞ്ഞു പോകും ഓരോ നിമിഷവും; 
സന്തോഷമായാലും സന്താപമായാലും,
മഴയായാലും വെയിലായാലും,
രാവായാലും പകലായാലും,
ഇവിടെ വർത്തിക്കും ഓരോ
നാളും ഓരോ നിമിഷവും;
ഓർമകളായ് സൂക്ഷിച്ചു വെയ്കാം; 
അമൂല്യമായ്, അദ്ഭുതമായ്;
വേദനയായ്, വിങ്ങലായ്;
സാന്ത്വനമായ് സ്വപ്നമായ്;
എന്നുമെന്നും അയവിറക്കാം;
നീണ്ട സുഷുപ്തിയില്‍ ആഴുംവരെ;
ശുഭരാത്രി !!

Dec 11

കാഴ്ചകൾ അത്രയും കണ്ടുനടക്കാൻ, 
കണ്ണുകള്‍ രണ്ടുണ്ടായിട്ടും;
കാണാത്ത കാഴ്ചകൾ ഏറെ ബാക്കി; 
വേണം മനം നിറയെ കണ്ണുകൾ;
കൗതുകങ്ങള്‍ ഓരോന്ന് കാണുവാനായ്;
കണ്ടതെല്ലാം ആസ്വദിക്കാന്നായി ;
അറിയാതെ കണ്ണുകൾ കൊതിക്കുന്നു;
സങ്കടങ്ങള്‍ കാണും കണ്ണുകൾ,
കണ്ണുകളിൽ ഇരുട്ട്‌ നിറയ്ക്കുന്നു;
കണ്ണീർ ധാരയായ് ഒഴുക്കുന്നു;
കണ്ണീരിലും സന്തോഷം നിറയ്ക്കുന്നു;
കാണില്ലെന്നറിഞ്ഞിട്ടും കാണാനായി
വൃഥാ ആഗ്രഹിക്കുന്നു;
ഇനിയും മരിക്കാത്ത സ്വപ്‌നങ്ങൾക്കായി,
കാവൽ നില്ക്കുന്നു!!

Dec 12

നഷ്ട സ്വപ്നത്തിൻ ഭാണ്ഡങ്ങൾ ഒക്കെയും,
അടുക്കി വെച്ചാ മുറി താഴിട്ടു പൂട്ടി;
കൈ മോശം വന്നൊരാ താക്കോൽ തിരക്കി, 
പിന്നിട്ട വഴികൾ തിരികെ നടന്നു;
തുറക്കാത്ത വാതിൽ തുറക്കാനായ്,
പണികൾ പതിനെട്ടും പണിഞ്ഞു;
മുള്ളുകൾ നിറഞ്ഞൊരാ പാതകൾ,
പിന്നെയും പിന്നെയും തിരഞ്ഞു;
മുറിവേറ്റ് വിങ്ങും ഹൃദയത്തിൻ
വേദനയ്ക്കതീതമല്ല,
രക്തം കിനിയും പാദങ്ങൾ;
എന്നാലും തിരഞ്ഞു ഞാൻ
പൊയ്പോയ വഴികളെല്ലാം;
മാർഗങ്ങൾ പലതും തേടി നടന്നു,
മണിച്ചിത്ര താഴ് തുറക്കാനായി;
സ്നേഹത്തിൻ വർണങ്ങൾ
എങ്ങാനും തടഞ്ഞാലോ;
പുതിയൊരു പൂക്കാലം
കൂട്ടായി വന്നാലോ !!

Dec14

പ്രഭാത കിരണങ്ങൾ തഴുകി ഉണർത്തിയ,
സുന്ദരീ നിനക്കെന്തേ ഇന്നിത്ര തിളക്കം;
ഇന്നലെ പെയ്ത മഴത്തുള്ളികള്‍,
നിന്നിൽ ഉതിർത്ത മന്ദഹാസമോ;
ഇളം തെന്നലിൻ വിരൽ സ്പർശമോ;
പാറി പറക്കും ശലഭത്തിൻ ചിറകനക്കം,
അറിയാതെ ഉളവാക്കും പുഞ്ചിരിയോ;
പ്രസരിപ്പായ് വാടാതെ കൊഴിയാതെ
ഈ ദിനം മുഴുവനും നീണ്ടു നില്ക്കാൻ
നേരുന്നു ശുഭദിനം!!

Dec 15

ജീവിതം പഠിപ്പിച്ച പാഠങ്ങളെല്ലാം,
വേദനകളും, ക്ലേശങ്ങളും നിറഞ്ഞതായിരുന്നു;
തോൽവികൾ ഉൾകൊള്ളാൻ താനേ പഠിച്ചു,
സമ്മര്‍ദ്ധങ്ങള്‍ നേരിടാൻ കരുത്ത് നേടി;
സന്തോഷത്തേക്കാളേറെ ദുഃഖങ്ങള്‍ നേരിട്ടു;
സങ്കടങ്ങള്‍ എല്ലാം അണ കെട്ടി നിർത്തി ;
നഷ്‌ടങ്ങള്‍ നികത്താനാവാതെ വലഞ്ഞു;
ഒറ്റപ്പെടലിന്റെ തടവറ തീർത്തു;
പരിഭവമെല്ലാം മായ്ച്ചു കളഞ്ഞു;
പൊരുതി നില്ക്കാൻ ധൈര്യം നേടി;
ക്രൂരതയോട് പൊരുതി ജയിച്ചു;
കരുണയില്ലാത്ത വിധിയ്ക്ക് മുന്‍പില്‍
പകച്ചു പോകാതെ പിടിച്ചു നിന്നു!!

dec 16

ജീവിതം ഒരു തുറന്ന പുസ്തകം;
ചോദ്യങ്ങൾ അനവധി ഉള്ളില്ലുണ്ട്, 
ഉത്തരമില്ലാത്തവ ഏറെയാണ്‌; 
കണക്കു കൂട്ടലുകൾ വെട്ടി തിരുത്തി; 
ശരിയുടെ എണ്ണം കുറഞ്ഞിരുന്നു;
ഏറെയും വളഞ്ഞ വഴികളായിരുന്നു;
ലക്ഷ്യത്തിൽ എത്താൻ പാടുപെട്ടു,
തെറ്റുകൾ തിരുത്താൻ അവസരം തേടി,
ശിക്ഷകളെല്ലാം താനേ എറ്റുവാങ്ങി;
മിഴിനീർ കൊണ്ട് താളുകൾ നനഞ്ഞു;
സന്തോഷത്തിൻ താളുകൾ അതിൽ കുതിർന്നു;
ശുഭ പ്രതീക്ഷകൾ കൈ വെടിഞ്ഞില്ല;
ഗൃഹപാഠം ചെയ്യാൻ തീരുമാനിച്ചു,
തെറ്റുകളെല്ലാം തിരുത്തിയെടുത്തു;
സ്നേഹം കൊണ്ടെല്ലാം ശരിയാക്കി;
ജീവിതം ഒരു കൊച്ചു പൂങ്കാവനമായ് !!

Dec 17

മുളംകാട്ടിലൂടെ യുള്ള പ്രയാണം,
കൊടും കാട്ടിൽ എത്തിച്ച നേരം; 
ഇരവു പകലുകൾ എണ്ണാതെ,
ആറു താണ്ടി കാട് കയറി ;
മലയും കുന്നും ചരിവും,
പുല്‍പ്പടര്‍പ്പുകളും മുള്ളുകളും,
ദുര്‍ഘട പാതകൾ പലതും പിന്നിട്ട്;
എന്നാലും വഴികൾ ഏറെയുണ്ട് ;
ഇനിയും പിന്നിടാനായ്‌;
ലക്ഷ്യ സ്ഥാനത്ത് എത്താനായ്;
ചുമലിലെ ചുമടിറക്കാനായ്‌ ;
തളരും നേരം തണൽ പ്രതീഷയിൽ,
നാലുപാടും തിരഞ്ഞു;
കിട്ടയത്‌ ഒരു ഉത്തരം മാത്രം,
നയിക്കുവാൻ നിനക്ക് നീ മാത്രം!!

dec18

കണ്ണീരിൻ വില അറിയാൻ 
കരയാതിരിക്കണം; 
ഹൃദയത്തിൻ വിങ്ങലുകൾ
നീറ്റലാകേണം;
ആഴ്ന്നിറങ്ങും മുള്ളുകൾ 
ഉള്ളിൽ തറയണം; 
മനമുരുകും കാഴ്ചകൾ
തേങ്ങലായ് മാറണം;
കരളലിയും ദു:ഖങ്ങൾ
പങ്കിടാതിരിക്കണം
സങ്കട കടലിൽ
മുങ്ങിതാഴണം;
വേർപാടിൻ വിരഹങ്ങൾ
അകതാരിൽ ഒഴുകേണം;
ആത്മാവിൻ ഗദ്ഗധങ്ങള്
ഉള്ളിൽ തിങ്ങണം ;
കണ്ണുനീരിന്‍ ഉറവകൾ
നിശബ്ദമാമെൻ വേദനകൾ!!

Dec 20

അഴകുള്ള പുഷ്പങ്ങൾ 
തീർത്തൊരു തോട്ടം;
നറുമണം വിതറും;
കാറ്റിൽ ആടും; 
വർണ്ണ കാഴ്ചകൾ പകരും; 
ഇവക്ക് ഞാനൊരു വെറും
പാലകൻ മാത്രം
മണ്ണിൽ സ്വർഗം പണിയാനായ്;
ക്ഷണികമാം ജീവനിൽ
അമൃതേകാനായ്;
ആത്മ നൊമ്പരങ്ങൾക്ക്
തണുവായ്;
കണ്ണുകൾക്ക്‌ ഇമ്പമേകും
പൂന്തോട്ടത്തിൻ കാവലായ്
നിൽക്കും ഉദ്യാന പാലകൻ !!

dec 21

മനസ്സിൽ എരിയും തിരിനാളം 
എന്നേ മാഞ്ഞു പോയ്‌ ; 
ഇരുട്ടിന്റെ ഇരുമ്പ് കൂട്ടിൽ 
ഞാൻ തനിച്ചായ്; 
കറുപ്പെഴും മേഘക്കീറിൽ 
വീഴും മിന്നൽ ചാലിൽ; 
പ്രതിബിംബം കണ്ടു 
ഞാൻ അന്തിച്ചു പോയ്‌;
വ്യര്‍ത്ഥമാം വ്യാമോഹങ്ങള്‍
എന്നിലുളവാക്കിയ മാറ്റങ്ങൾ;
സ്വപ്‌നങ്ങൾ മാത്രമായ്
തീരാൻ കൊതിച്ചു ;
ഒരഗ്നി ഗോളമായി വെന്തുരുകി
തീരുവാൻ മാത്രമായ്‌ വിധി !!

dec  22

സംഭ്രമത്തിൽ മുങ്ങി കുളിച്ച്;
പുരികക്കൊടി മുകളിലോട്ട് വളച്ച്;
ഉന്തിയ കണ്ണുകളുമായ്;
ഒന്നും ഉരിയാടാൻ ആകാതെ; 
ശ്വാസോച്വാസം താളം തെറ്റിച്;
ഹൃദയ മിടിപ്പിൻ അതിക്രമത്തിൽ;
ഉയർന്നു താഴും നെഞ്ചിൻ കൂട്ടിൽ;
കൈകൾ വരിഞ്ഞു കെട്ടി;
ചലനം നശിച്ച പാദങ്ങളുമായ്;
പ്രതികരിക്കാൻ ആകാതെ;
നില്കും ഈ അവസ്ഥയെ
എന്ത് പേരിട്ടു വിളിക്കേണം ?

Dec  23

നിദ്രയും സ്വപ്നവും കൈവിടും നേരം ;
അഴിക്കും തോറും കുരുങ്ങും 
ജീവിതത്തിൻ കെട്ടുപാടുകൾ; 
വേർപെടുതനാവാതെ ശ്വാസം മുട്ടിക്കും നേരം; 
കണ്ടില്ല, ഞാനീ വർണ്ണ പ്രപഞ്ചം
നീലാകാശവും ഒഴുകും മേഘങ്ങളും;
പൂത്തുലയും പൂമരവും;
കിളികളും കളകൂജനങ്ങളും;
അരുവികളും കാട്ടാറുകളും;
എല്ലാം അന്യമായ നേരം;
കൊതിച്ചു മോചനത്തിനായ്‌;
ദുഃഖങ്ങള്‍ ഉപേക്ഷികാനായ്‌;
സ്നേഹത്തിൻ സാമ്രാജ്യം തീർക്കാനായ്‌ !!

dec  24

കളിയായ്‌ തുടങ്ങിയത് കാര്യമായ് തീർന്നപ്പോൾ, കഥയാകെ മാറി; കളിയായും കാര്യമായും കാണാൻ ആശിച്ചത്, ഗൗരവമായ് എടുത്തപ്പോൾ നിലയില്ലാ കയത്തിൽ  മുങ്ങിയ പോലെ ആയി; കര കയറാൻ ശ്രമിക്കുംതോറും; പാതാളം വലിച്ചു കൊണ്ടേ പോയ്‌; കൂരിരുട്ടിൽ നിന്നും കരകയറാൻ തപ്പി തടഞ്ഞു മുന്നോട്ട് പോയ്‌ ; തട്ടിയും മുട്ടിയും നീങ്ങുന്തോറും അതിയായ് മോഹിച്ചു പ്രാർഥിച്ചു; ഒരിറ്റു വെളിച്ചം കാണാനായ് അതിൽ ഒരു തിരി കത്തിക്കാനായ്!! Dec  25 നീർകുമിളകൾ മാത്രമീ ജീവിതം;  ഏത് നിമിഷവും പൊട്ടി പോകും  പട്ടം പോലൊരു ചരട് ; ഞാണിൻ മേലുള്ള കളി ; എല്ലാം അറിഞ്ഞിട്ടും അറിയാത്ത  ഭാവത്തിൽ എന്തിനു വേണ്ടീ കോപവും ക്രോധവും ; അറപ്പും വെറുപ്പും;, ദേഷ്യവും വിദ്വേഷവും; കത്തികുതും വടിവാൾ വെട്ടും; നാടെങ്ങും നടമാടും ഈ കാലം; കൊടുംകാറ്റും പേമാരിയും മാറി മാറി നാശം വിതക്കും; അനുകമ്പയും സ്നേഹവും ലവലേശം ഇല്ലാത്ത സ്വാര്‍ത്ഥവും, വ്യര്‍ഥവുമാമീ ജീവിതം!! Dec  26 ശരിയല്ലാത്തത് തെറ്റായി കാണാനും; തെറ്റായതു ശരി ആക്കി മാറ്റാനും;  ശരി ആയതു പിന്തുടരാനും; തെറ്റിലേക്ക് വഴുതി വീഴാതിരിക്കാനും;  ശരിക്കും നമ്മൾ ശ്രമിക്കുമെങ്കിലും; വിജയിക്കാൻ കഴിയാതെ തോറ്റു പോയാൽ; തോൽ‌വിയിൽ നിരാശരാകാതെ,  വീണ്ടും വീണ്ടും പ്രയത്നിച്ചാൽ; വിജയം കൊയ്യാൻ നമുക്ക് കഴിയുമെന്ന, ആത്മവിശ്വാസവും ശുഭാപ്‌തിവിശ്വാസവും; ആനന്ദത്തോടെ വരവേൽക്കാനും; സ്നേഹിക്കാനും തളിര്‍ക്കാനും പൂക്കാനും; നല്ല നാളെയെ എതിരേൽക്കാനും; പുത്തൻ പുലരിയിൽ പുതു- വർഷത്തെ എതിരേല്ക്കാനുള്ള; തയ്യാറെടുപ്പുകൾ നടത്താനുമായി, ആശംസിക്കുന്നു, പ്രാർഥിക്കുന്നു !! Dec  27 നിരന്തരം കാണാനും;  സുഹുർതായ് തുടരാനും;  സൌഹ്രദം പങ്കിടാനും; ആശയപരമായി പോരാടാനും; വിവാദങ്ങൾ ഉയർത്താനും; പ്രതിഷേധം അറിയിക്കാനും തമ്മിൽ തല്ലാനും,  പിന്നെയും ഇണങ്ങാനും; രഹസ്യങ്ങൾ കൈമാറാനും; ആപത്തിൽ തുണയാകാനും; വേദനകളിൽ താങ്ങായ് തണലായ്‌, ഒരു വിളിപാടകലെ, കൂടെ ഉണ്ടാകും നീ ആണെന് ഉറ്റ ചങ്ങാതീ !! Dec 28 രാത്രിയുടെ കൈകളിൽ, ആടും നിലാവ് പോൽ  ചാഞ്ചാടും മനസ്സ് ; ഓളങ്ങൾ അലതല്ലും ; തീരത്തടിയാതെ എങ്ങോ  തുഴഞ്ഞു പോം തോണി പോൽ, നഗ്നമാം യാഥാർത്യങ്ങളെ നെഞ്ചിലേറ്റി തുഴയവെ, ലക്ഷ്യമില്ലാതെ ഒഴുകും പുഴ തൻ നടുവിൽ, നിരാശ തൻ ചുഴിയിൽ നീറി പുകയവേ പ്രത്യാശയുടെ പൊന്‍കിരണമായി സ്നേഹത്തിൻ ലോകത്തിലേക്ക്‌; സന്തോഷത്തിൻ നാളുകളിലേക്ക്; സ്വപ്നം കാണാനായ്‌ ...... യാഥാർത്യമാകാനായ് ...... Dec 29 വാക്കുകൾ കൊണ്ടൊരു മായിക വലയം സൃഷ്ട്ടിച്; മാലോകരെ ആകെ അതിനുള്ളിലാക്കി ; സർക്കസ് തമ്പ് പോലൊരു കൂടാരമുണ്ടാക്കി;  പരസ്പരം മനസ്സിലാക്കാൻ അവസരം ഒരുക്കി ; ഉണ്ടുറങ്ങി അവിടെ വസിക്കാൻ താവളം തീർത്ത്;  സ്നേഹവും സന്തോഷവും പകർന്നു കൊടുത്ത്; നന്മയും ഐശ്വര്യവും പങ്കിട്ടെടുത്ത്; ചതിയും വഞ്ചനയും അരുതെന്ന് വിലക്കി ; ആർത്തിയും ദുരാഗ്രഹവും ദൂരത്താക്കി ; പണമെന്ന വസ്തുവിനെ ഇല്ലാതാക്കി; ജാതി മത ചിന്തകൾ തുടച്ചെറിഞ്ഞു ; ഏഴകളും അബലകളും മാറി മറിഞ്ഞു ; ഉച്ച നീചത്വം കരിഞ്ഞു ചാമ്പലായി ; തേങ്ങലുകളും വിങ്ങലുകളും ദൂരെ ഒളിച്ചു; അഴുക്കു ചാൽ സ്ഫടികം പോലായി; പൂക്കൾ ചിരിക്കും വസന്തം വരുത്തി; അങ്ങനെ ഭൂമിയിൽ സ്വർഗം തീർത്ത് ഇതായിരിക്കട്ടെ "2016" എന്നാശംസിച്ചു !!                                            30-12-2015                                                                                                        അലിവുള്ള ഹൃദയത്തിൽ ദയ ഉണ്ടെന്നും, പരോപകാരം പുണ്യമെന്നും;  പലവുരു നമ്മെ പറഞ്ഞു പഠിപ്പിച്ചു; എന്നാൽ നാം കാണും ഈ ലോകം,  എന്ത് പറഞ്ഞാലും എന്ത് ചെയ്താലും;  വിവാദം കൊണ്ടടി മുടി മൂടും;  നന്മയൊട്ടു കണ്ടില്ലെന്നു വെയ്ക്കും;  തിന്മ യാകെ കൊട്ടി ഘോഷിക്കും; അറിവും വിവരവും ദുരുപയോഗിച്ച്; സമാധാനം ആകെ താറുമാറാക്കും; കുഴച്ചു മറിച്ച്‌ ചൂളയിൽ വെച്ച് ; വെന്തുര്ക്കി വെണ്ണീർ ആക്കും; വിവേകമോടെ പ്രവർത്തിച്; ചുവപ്പിച്ചെടുത്ത ഇഷ്ടികയാക്കാൻ; സമയമായി കാലമായി ... ആഗ്രഹങ്ങൾ സാക്ഷാത്കരിക്കാം, പുതിയൊരു നാളെയെ വരവേൽക്കാം, പുതു വത്സരാശംസകൾ !!                                                                      31-12-2015                വേദന കാര്‍ന്നു തിന്നുമാ നേരത്തിൽ,  ചേതന ചോര്‍ന്നു പോകും വേളയിൽ;  തിളക്കമറ്റ കണ്ണുകളിൽ വരും ദീനതയാൽ; വിങ്ങുന്ന വേദനയിൽ പിടയുന്ന ജീവനാൽ, നിശബ്ദമായി നിലവിളിക്കും വേദന. ചിന്തകളുടെ തീയിലെരിഞ്ഞ് മനസ്സുരുകും വേദന; ക്രൂരമാം വിനോദത്തിൽ മുഴുകി  ലഹരി പിടിപ്പിക്കും വേദന; അകലുമ്പോള്‍ അറിയുന്നു വിരഹത്തിന്‍ വേദന; ആയുസ്സു മുഴുവനും നീറ്റുന്ന വേദന; വേദന പലവിധം വാഴുന്നു ഉലകത്തിൽ; വേദനയുടെ ചുഴലിക്കാറ്റ് നശിപ്പിക്കും മുമ്പ്, വേദന നാം ഇതില്‍നിന്നും മുക്തരാവട്ടെ; വേദനയില് നിന്നും ഊർന്നു വീണ, ആര്‍ദ്രമായൊരാ നിമിഷങ്ങളെല്ലാം, തിരിച്ചു വരാത്ത ഓർമകളാവട്ടെ ; വേദനയില്ലാത്ത രോദനമില്ലാത്ത പുതു വർഷം നാം വരവേൽക്കട്ടെ !!